ეროვნული თავდაცვის აკადემია

სამხედრო სასწავლებლების ისტორია, საქართველოში, 1862 წელს, თბილისის სამხედრო სკოლის დაარსებით იწყება. საქართველოს დემოკრატიული რესპუბლიკის პერიოდში, საქართველოს შეიარაღებული ძალების მთავარსარდლის, გენერალ გიორგი კვინიტაძის ხელმძღვანელობით, 1919 წლის შემოდგომაზე, ქართველ იუნკერთა სამხედრო სკოლა შეიქმნა, რომელიც 1921 წელს, რუსეთის მიერ საქართველოს ოკუპაციის შედეგად, ამ დასახელებით გაუქმდა. კომუნისტური მმართველობის დროს, სამხედრო სკოლა ჯერ წითელარმიელ კურსანტთა სამხედრო სასწავლებლად, შემდეგ კი თბილისის საარტილერიო სასწავლებლად გადაკეთდა და 1991 წლამდე იარსება.

 

1993 წლის 28 მაისს, საქართველოს თავდაცვის მინისტრის ბრძანების საფუძველზე, საქართველოს რესპუბლიკის გაერთიანებული სამხედრო აკადემია შეიქმნა, რომელმაც სტუდენტების პირველი ნაკადი 1993 წლის 1 სექტემბერს მიიღო. მოგვიანებით, სასწავლებელს ჯერ თავდაცვის ეროვნული აკადემია, ხოლო შემდგომ, ეროვნული თავდაცვის აკადემია ეწოდა. 2003 წლის 20 თებერვალს, აკადემიას დავით აღმაშენებლის სახელი მიენიჭა. 2009 წლიდან, სასწავლებელი ქალაქ გორში განლაგდა.

 

2010 წელს, აკადემიაში ოფიცერთა განათლების სისტემის რეფორმა დაიწყო. იმავე წლის 8 დეკემბერს, აკადემიამ, თავდაცვის სამინისტროს გადაწყვეტილებით, საჯარო სამართლის იურიდიული პირის სტატუსი მოიპოვა. 2013 წლიდან, აკადემიის კურსანტებს, 1921 წელს საქართველოს დამოუკიდებლობისთვის ბრძოლაში გმირულად დაღუპული იუნკერების ხსოვნის პატივსაცემად, ისტორიულ ი სახელი „იუნკერი“ დაუბრუნდათ.

 

დავით აღმაშენებლის სახელობის საქართველოს ეროვნული თავდაცვის აკადემია ქვეყნის წამყვანი უმაღლესი სამხედრო სასწავლებელია, რომელიც ქართული შეიარაღებული ძალებისთვის, აკადემიური უმაღლესი და სამხედრო განათლების მქონე ოფიცერთა მომზადებას უზრუნველყოფს. ამჟამად აკადემიაში წარატებით ფუნქციონირებს საბაკალავრო სკოლა, სამაგისტრო პროგრამა,  სამეთაურო-საშტაბო კურსი, ოფიცერთა მომზადების საკანდიდატო კურსი, ენობრივი მომზადების სკოლა.

 

ვებ გვერდი: http://eta.edu.ge/