საერთაშორისო ორგანიზაციები

გაერო (UN)

 

2015 წლიდან საქართველო მონაწილეობს ავღანეთის ისლამურ რესპუბლიკაში გაეროს მხარდაჭერის მისიაში (UNAMA) , რომელიც ჩამოყალიბდა 2002 წლის მარტში გაეროს უშიშროების საბჭოს #1401 რეზოლუციით). UNAMA-ს მისიაში უფროსი სამხედრო მრჩევლის თანამდებობაზე მონაწილეობა 2016 წლის 27 სექტემბერს წარმატებით  დაასრულა საქართველოს შეიარაღებული ძალების გენერალური შტაბის უფროსმა, გენერალ-მაიორმა ვლადიმერ ჩაჩიბაიამ.  2015 წლიდან 2017 წლის ბოლომდე (UNAMA-ს მრჩეველთა მისიის ამოწურვამდე) გაეროს მისიაში ასევე მივლენილია  ორი სამხედრო მოსამსახურე უფროსი სამხედრო მრჩევლის თანაშემწისა და სამხედრო მრჩევლის პოზიციებზე.

 

ეუთო (OSCE)

 

2014 წელს ძალაში შევიდა საქართველოსა და ეუთოს შორის ურთიერთგაგების მემორანდუმი „მცირე და კონვენციური შეიარაღების და საწყობების პროგრამის შესახებ“. აღნიშნული მემორანდუმის ფარგლებში 2015 წლის იანვრიდან წარმატებით მიმდინარეობს ვადაგასული და გამოუსადეგარი საბჭოთადროინდელი საბრძოლო მასალის დემილიტარიზაციის პროცესი.

 

ამჟამად მიმდინარეობს ვადაგასული რაკეტებისა და ჭურვების დემილიტარიზაციის პროცესის მეორე ეტაპი, რომელიც 2016 წლის ნოემბერს დაიწყო.

 

სამხრეთ აღმოსავლეთ თავდაცვის მინისტერიალი (SEDM)

 

2017 წლის ოქტომბერს საქართველოს თავდაცვის სამინისტრომ უმასპინძლა სამხრეთ-აღმოსავლეთ თავდაცვის მინისტერიალის (SEDM) შეხვედრას. ორგანიზაციის, რომლის წევრიც საქართველო 2015 წლის 10 სექტემბერს გახდა, საფუძველი ჩაეყარა 1996 წელს ამერიკის შეერთებული შტატების ხელშეწყობით. მინისტერიალის წევრი ქვეყნები არიან: ალბანეთი, ამერიკის შეერთებული შტატები, ბოსნია-ჰერცეგოვინა, ბულგარეთი, თურქეთის რესპუბლიკა, იტალიის რესპუბლიკა, მონტენეგრო, რუმინეთი, საბერძნეთი, სერბეთი, სლოვენია, უკრაინა, ყოფილი იუგოსლავიის ქვეყანა მაკედონია და ხორვატია. დამკვირვებლის სტატუსით სარგებლობს მოლდოვა.

 

მინისტერიალის მიზანია რეგიონის ქვეყნებს შორის თანამშრომლობის კონსოლიდაცია რეგიონში უსაფრთხოებისა და მშვიდობის, ასევე რეგიონის ქვეყნების ევროატლანტიკურ სტრუქტურებში ინტეგრაციის ხელშეწყობის მიზნით. აღნიშნული ინიციატივა მოწოდებულია ხელი შეუწყოს უსაფრთხოებას არა მარტო რეგიონში, არამედ რეგიონის ფარგლებს გარეთ ისეთ ორგანიზაციებთან თანამშრომლობის ფარგლებში, როგორიცაა ნატო, გაერო და ეუთო.

 

წითელი ჯვრის საერთაშორისო კომიტეტი (ICRC)

 

საქართველოს თავდაცვის სამინისტრო 2002 წლიდან თანამშრომლობს  წითელი ჯვრის საერთაშორისო კომიტეტთან.  2014 წლის 21 მაისს ხელი მოეწერა ურთიერთგაგების მემორანდუმს „საერთაშორისო ჰუმანიტარული სამართლის ცოდნის გავრცელებისა და ინტეგრაციის სფეროში თანამშრომლობის თაობაზე“.

 

მემორანდუმის მიზანია საქართველოს შეიარაღებულ ძალებში საერთაშორისო ჰუმანიტარული სამართლის პრინციპების (IHL) დანერგვის, გავრცელების, განვითარების ხელშეწყობა და განხორციელება.აღნიშნული მემორანდუმი ხელს შეუწყობს თავდაცვის სამინისტროსა და წითელი ჯვრის საერთაშორისო კომიტეტს შორის თანამშრომლობის გაღრმავებას და საქართველოს შეიარაღებულ ძალებში ჰუმანიტარული სამართლის პრინციპების დანერგვის პროცესის ინტენსიფიკაციას.

 

გარდა ამისა, სამინისტრო აქტიურად თანამშრომლობს 90-იან წლებში და 2008 წლის აგვისტოს ომის შედეგად უგზო-უკვლოდ დაკარგულთა და დაუდგენელ გარდაცვლილთა იდენტიფიცირებასთან დაკავშირებით.

 

საერთაშორისო ხელშეკრულებები

 

საქართველოს თავდაცვის სამინისტროს საერთაშორისო თანამშრომლობა ეფუძნება მნიშვნელოვან საერთაშორისო-სამართლებრივ ბაზას. თავდაცვის უწყებას გაფორმებული აქვს თანამშრომლობის შესახებ საერთაშორისო შეთანხმებები არაერთ პარტნიორ ქვეყანასთან, მათ შორის,  საფრანგეთთან, დიდი ბრიტანეთთან, აშშ-სთან, თურქეთთან, იტალიასთან, დანიასთან, ჩეხეთთან, უნგრეთთან, პოლონეთთან, ბალტიის ქვეყნებთან, უკრაინასთან, აზერბაიჯანთან.  გარდა ამისა, საქართველოს თავდაცვის სამინისტროს ძალისხმევითა და მონაწილოებით შექმნილია საერთაშორისო ორგანიზაციებთან თანამშრომლობის საერთაშორისო-სამართლებრივი ჩარჩოები, კერძოდ,  გაფორმებულია არაერთი შეთანხმება ჩრდილო-ატლანტიკური ხელშეკრულების ორგანიზაციისა (ნატო) და ევროპის კავშირის  შესაბამის ორგანოებთან. ამ შეთანხმებების საფუძველზე საქართველოს თავდაცვის სამინისტროს და, შესაბამისად, ქვეყანას აქტიური წვლილი შეაქვს საერთაშორისო და რეგიონული უსაფრთხოების საკითხებში.