ნატოს შემფასებელთა ჯგუფის ვიზიტი
2 მაისი 2019

საქართველოს თავდაცვის სამინისტრო ნატოს შემფასებელთა ჯგუფს მასპინძლობს.  დელეგაციას ნატოს საერთაშორისო სამსახურის თავდაცვის პოლიტიკისა და დაგეგმვის სამმართველოს, თავდაცვის დაგეგმვის დირექტორატის ხელმძღვანელი პოლ სავერო ხელმძღვანელობს.

სამდღიანი ვიზიტის მიზანს  დაგეგმვისა და მიმოხილვის პროცესის დოკუმენტით განსაზღვრული პარტნიორობის მიზნების განხორციელების შეფასების ქართულ მხარესთან ერთად განხილვა წარმოადგენდა. პარტნიორობის მიზნების წარმატებით შესრულება  საქართველოს თავდაცვისა და უსაფრთხოების სფეროს შესაძლებლობების განვითარებასა და ნატოსთან თავსებადობის ამაღლებას უწყობს ხელს.

ვიზიტის ფარგლებში მინისტრის პირველმა მოადგილემ ლელა ჩიქოვანმა შემაჯამებელი შეხვედრა გამართა ნატოს დელეგაციის წარმომადგენლებთან, ასევე საქართველოში მოვლენილ ნატოს ექსპერტებთან და პარტნიორი ქვეყნების მრჩევლებთან. შეხვედრაზე  ნატო-საქართველოს თანამშრომლობის ფარგლებში მიღწეული პროგრესი განიხილეს და  სამომავლო გეგმები დასახეს.

შეხვედრაზე მინისტრის პირველმა მოადგილემ ნატო-საქართველოს ურთიერთობების გაღრმავებაში შეტანილი წვლილისთვის პოლ სავეროს მადლობის სერთიფიკატი გადასცა.

ვიზიტის ფარგლებში, ნატოს შემფასებელთა ჯგუფის წევრებმა, ასევე, შეხვედრები გამართეს შინაგან საქმეთა სამინისტროს, იუსტიციის სამინისტროს მონაცემთა გაცვლის სააგენტოს, ფინანსთა სამინისტროს, საგანგებო სიტუაციების მართვის სამსახურისა და საგარეო საქმეთა სამინისტროს წარმომადგენლებთან.  

ვიდეო რეპორტაჟი